BBC ka realizuar një artikull në të cilën ka listuar disa prej shkrepjeve më të bukura të Hënës së plotë nëpër botë. Secila nga tyre paraqet një pamje magjike pranë monumenteve e identifikimeve kulturore në vendeve të ndryshme.
“Ndërkohë, këtu janë disa nga fotot më të mira të superhënës të së martës nga e gjithë bota”, ka shkruar BBC në artikull.
Ndërkaq fotografia e dytë e përzgjedhur nga mediumi ndërkombëtar është pikërisht pamja e Prishtinës.
“Hëna ‘Sturgeon’ e së martës, e quajtur kështu pas rritjes së numrit të peshqve në liqenet e Amerikës së Veriut në këtë kohë të vitit, shkëlqen mbi ndërtesat në Prishtinë, Kosovë”, shkruhet në fotolegjendën e fotografisë me autorësi të Getty Images.
Hëna e plotë në kryeqytetin kosovar shoqërohet nga drita që lëshohet nga katedralja dhe ndërtesat e larta të cilat i ka përreth, e që e bën fotografinë me motive urbane.
Fotografitë e tjera të publikuara nga BBC janë nga Malta, Qipro, Izraeli, Kina, Turqia e Spanja.
