Ministrja e Drejtësisë, Albulena Haxhiu ka bërë të ditur se është mbledhur Grupi Ndërministror Kundër Dhunës në Familje.
Në një postim në Facebook, ministrja Haxhiu ka thënë se kanë diskutuar mbi përgjigjet e institucioneve për gjetjet dhe rekomandimet e Institucionit të Avokatit të Popullit për rastin e 11 vjeçares.
Po ashtu në këtë takim, është diskutuar edhe për mungesën e vullnetit për bashkëpunim nga ana e Këshillit Prokurorial dhe Komunës së Prishtinës, për të cilat Haxhiu ka theksuar nuk i janë përgjigjur adresimeve nga Ministria e Drejtësisë për këtë rast.
“Diskutuam mbi rëndësinë e hartimit të planeve individuale për viktimat që janë në mbrojtje sociale dhe kërkuam rishikim të formave të vlerësimit të cilat janë standarde që nga viti 2003”, ka shkruar Haxhiu.
Tutje Haxhiu ka thënë se grupin ndërministror e ka njoftuar lidhur me veprimet e ndërmarra nga Qeveria për zbatimin e Ligjit për Mbikëqyrjen Elektronike, zbatimi i së cilit mundëson monitorimin e lëvizjeve të dhunuesve dhe mbrojtjen e viktimave të dhunës.
