Ministrja franceze e Sportit, Amélie Oudéa-Castera, ka kritikuar mesazhin politik që Novak Djokovic dha pas ndeshjes së tij të raundit të parë në Roland Garros, duke ia bërë të qartë tenistit serb se nuk duhet ta përsërisë më atë që bëri.
“Është e qartë që ishte diçka që nuk duhej bërë”, tha ministrja në një intervistë për “France 2”, kur u pyet për veprimin e Djokovicit ditën e hënë, kur shkroi në kamera “Kosova është zemra e Serbisë” menjëherë pasi përfundoi ndeshja ndaj Kovacevic.
Ministrja shtoi se drejtoresha e turneut “Roland Garros”, ish-tenistja Amelie Mauresmo, ka folur me tenistin dhe i ka vënë në dukje se “Grand Slam”-i francez është neutral.
“Ajo që bëri Novak Djokovic ishte shumë politike, prandaj nuk duhet përsëritur më”, tha Amélie Oudéa-Castera.
