Kryeparlamentari Glauk Konjufca, tha se nuk mund të arrihet zhvillim nëse nuk ka barazi ndërmjet burrave e grave.
Këto komente Konjufca i bëri ne seminarin me teme “Promovimi i një parlamenti me ndjeshmëri gjinore”.
“Njerëzimi që të jetë njerëzor nuk është i mundshëm pa barazinë e gruas dhe të burrit, prandaj më vjen mirë që Rrjeti i Grave Parlamentare të Asamblesë Parlamentare të Frankofonisë përmes këtij seminari po e vë në spikamë barazinë gjinore sepse pa barazi gjinore, nuk ka barazi gjinore”, tha Konjufca.
Ai shtoi se aspekti bazik i qytetërimit është barazia e grave me burrat, ndwrsa sipas tij Kosova po bën veprime të shumta dhe po merr masa të vazhdueshme për ta luftuar pabarazinë.
“Në vitin 2020, Kuvendi e miratoi Konventën e Stambollit, kurse vitin e kaluar u miratua strategjia kombëtare për mbrojtjen nga dhuna në familje dhe dhuna ndaj grave”, tha tutje Konjufca.
Ndërsa kryetarja e Rrjetit të Grave Parlamentare të APF, Chantal Soucy, përmendi luftën e fundit në Kosovë, me ç’rast tha se shumë prej viktimave të luftës ishin edhe gra.
Kuvendi i Kosovës ka qenë nikoqir i seminarit “Promovimi i një parlamenti me ndjeshmëri gjinore”, të organizuar nga Asambleja Parlamentare e Frankofonisë, Rrjeti i Grave Parlamentare të Asamblesë Parlamentare të Frankofonisë dhe me mbështetjen e Organizatës Ndërkombëtare të Frankofonisë, raporton Ekonomia Online.Seminari në fokus kishte marrjen parasysh të barazisë gjinore në procesin legjislativ.
