Kryeministri Albin Kurti e ka bërë hapjen e mbledhjes së sotme të Qeverisë me disa fjalë për vendimin e liberalizimt të vizave dhe pranimin e aplikimit në Këshill të Evropës, duke thënë se këto janë konfirmim se Kosova është në rrugën evropiane e në “rrugën e duhur”.
Ai tha se javën që lamë pas dhe këtë javë çdo qytetar është ndier më evropian dhe më afër Evropës.
“Liberalizimi kishte ngecur për katër vjet në agjendën e Këshillit të Bashkimit Evropian. Me shumë mund e angazhim, veçanërisht me vendet hezituese arritëm ta zhbllokojmë këtë proces. Nga 1 janari i vitit të ardhshëm qytetarët më në fund mund të udhëtojnë pa viza. Pasaporta jonë do të jetë më e fuqishme ashtu siç po bohet shteti ynë çdo ditë”, ka thënë ai në nisje të mbledhjes së Qeverisë të mërkurën.
Kurti ka thënë se beson që Kosova do ta japë kontributin e saj, si anëtare me të drejta të barabarta në Këshill të Evropës.
“Dy vendimet e rëndësishme brenda më pak se një jave konfirmojnë rrugën tonë evropiane… se jemi në rrugën e duhur dhe bëjmë pjesë aty ku duhet në Evropë”, ka thënë tutje ai.
Ai ka falënderuar edhe një herë zëvendëskryeministrat Besnik Bislimi dhe Donika Gërvalla, sikurse edhe ministrin e Punëve të Brendshme Xhelal Sveçla dhe stafet e tyre për punën e palodhshme dhe suksesshme.
“Nga 1 janari i vitit të ardhshëm qytetarët do të mund të udhëtojnë lirshëm dhe pa viza në 32 vende evropiane. Pasaporta jonë do të jetë më e fuqishme ashtu siç vendi jonë do të bëhet përherë e më i fortë”, tha ai.
Kryeministri KUrti shprehu besimin se si shtet i ri demokratik dhe paqedashës Kosova do të jap kontribut të çmueshëm si anëtar me të drejta të plota në Këshill të Evropës.
Kryeministri mandej foli për Projektligjin për personat e zhdukur gjatë luftës në Kosovë dhe mbledhja po vazhdon me pikat tjera të rendit të ditës, ku janë gjithsej 15.
