Partisë Socialdemokrate i është shqiptuar gjobë nga Policia e Kosovës për moslajmërim të protestës kundër formimit të Asociacionit të Komunave me shumicë serbe, më 25 mars të këtij viti.
Këtë e ka bërë të ditur Teutë Rrusta nga radhët e PSD-së me anë të një postimi në Facebook. E njëjta ka thënë se mbajtja e protestës ishte paralajmëruar.
‘Edhe një gjobë e re ndaj PSD-së, sot. Tash për protestën e fundit. Në raport të policisë ndëshkohemi për mos njoftim të protestës. Ani pse kemi njoftu, publiku, bërë thirrje e çka jo. Metoda po dihet, logjika u kuptua. Nëse dojnë prej neve me ua ofru skenaret e protesave dhe aksioneve, le ta dinë që kjo nuk ka me ndodhë. E drejta për protestë, përdorimi i hapësirave publike nuk munden me u cenu prej asnjë pushteti. Ato janë tonat. Shantazhi me financa ka filluar pasi nuk iu shkoi ajo me polici. Dobët, dobët.’, ka shkruar ajo.
PSD-ja gjatë të shtunës së 25 marsit protestoi në shenjë mospajtimi për marrëveshjen e arritur në Ohër të Maqedonisë së Veriut. Gjatë saj, e njëjta kërkoi edhe dorëheqjen e Kryeministrit, Albin Kurti.
Kujtojmë se Partia Socialdemokrate (PSD) të martën është gjobitur me 20 mijë euro edhe nga Agjencia për Informim dhe Privatësi (AIP), për “përpunim të kundërligjshëm të të dhënave personale”.
