Komisioni për përzgjedhje të kandidatëve për anëtarë të Bordit Drejtues të Fondit të Kursimeve Pensionale të Kosovës ka vendosur të premten që ta rishpallë edhe një herë konkursin për anëtar të Bordit në Trusit.
Komisioni ishte i përbërë nga guvernatori i përkohshëm i BQK-së, Bashkim Nurboja (kryesues), ministri i Financave, Punës dhe Transfereve, Hekuran Murati dhe auditorja e përgjithshme, Vlora Spanca.
“Komisioni sot mbajti një takim për të diskutuar procedimin e mëtejmë për të siguruar plotësimin sa më të shpejtë të pozitave vakante të anëtarëve të Bordit Drejtues të FKPK-së. Në takim mori pjesë edhe përfaqësuesi i projektit të asistencës teknike të Ambasadës Britanike për rekrutimet në pozitat e larta publike në Kosovë. Duke vlerësuar se në konkursin e fundit të shpallur për këto pozita, kishte mangësi në kërkimin e informacioneve të nevojshme për të siguruar një vlerësim dhe verifikim objektiv të kandidatëve brenda një periudhe të arsyeshme kohore, Komisioni unanimisht vendosi që ky konkurs të rishpallet me plotësimet e nevojshme”, thuhet në njoftim.
Konkursi i plotësuar, sipas njoftimit, do të shpallet javën e ardhshme dhe procesi i përzgjedhjes, siç thuhet, do të jetë i asistuar në kuadër të projektit në fjalë të Ambasadës Britanike.
