Deputeti i Lëvizjes Vetëvendosje, Mefail Bajqinovci, ka reaguar pasi është arritur një dakordim në Ohër mes kryeministrit të Kosovës dhe atij të Serbisë.
Përmes një shënimi në Facebook, ai e ka mbrojtur marrëveshjen derisa ka thënë se e njëjta e zhbën “Zajednicën” e vitit 2013 dhe 2015.
“Marrëveshja më në fund e shkrinë fusnotën. E zhbën Zajednicën e 2013 dhe 2015 në vetëmenaxhim kushtetues”.
Bajqinovci ka numëruar edhe disa aspekte tjera pozitive që sjell marrëveshja, derisa nuk i ka kursyer kritikat ndaj opozitës.
“E ngritë në çështje urgjente temën e të zhdukurve. I hap rrugë Kosovës për njohjet e reja dhe anëtarësim në organizata ndërkombëtare. Siguron njohjen e pasaportave dhe simboleve. Dhe nuk ia plotëson dëshirën opozitës dhe opozitarëve”, ka shkruar tutje deputeti i LVV-së.
Ndryshe, të shtunën shefi i politikës së jashtme të Bashkimit Evropian, Josep Borrell, tha se udhëheqësit e Kosovës dhe të Serbisë u pajtuan për zbatimin e Marrëveshjes drejt normalizimit të marrëdhënieve mes tyre, të mbështetur nga BE-ja.
Duke iu adresuar gazetarëve, ai tha se kjo është një “arritje e rëndësishme”.
“Ajo që palët pranuan, është që Marrëveshja dhe zbatimi i saj përmes Aneksit të bëhen pjesë integrale e rrugëve të tyre përkatëse drejt Bashkimit Evropian”, tha Borrell.
Kryeministri i Kosovës, Albin Kurti, tha se pajtimi i arritur në Ohër është “njohje e ndërsjellë de facto” e Kosovës dhe Serbisë.
Presidenti i Serbisë, Vuçiq, tha se formimi i Asociacionit “është bërë detyrim me prioritet”.
