Ish- zyrtarja e Zyrës së Gjendjes Civile në Vushtrri, Hamide Uka, është dënuar me 10 muaj burgim me kusht, pasi një ditë më parë pranoi fajësinë për keqpërdorim të detyrës zyrtare, duke thënë se për shkak të ngarkesës dhe volumit të madh të punës nuk ka respektuar procedurat ligjore për regjistrimin e një personi civil.
Aktgjykimi u shpall të martën në Gjykatën Themelore në Mitrovicë, nga gjyqtari i rastit Mentor Hajraj.
Sipas aktgjykimit, dënimi prej dhjetë muaj burgim me kusht, nuk do të ekzekutohet nëse e akuzuara në afat prej 2 viteve nga dita e plotfuqishmërisë së aktgjykimit nuk do të kryejë ndonjë vepër tjetër penale, të natyrës së njëjtë apo më të rëndë.
Po ashtu, e akuzuara obligohet t’i paguajë shpenzimet e procedurës penale në shumë prej 20 euro, paushallin gjyqësor në shumë prej 20 euro, kurse në emër të fondit të kompensimit të viktimave shumën prej 50 euro.
Në shqiptimin e dënimit, gjykata si rrethana lehtësuese ka marrë pranimin e fajësisë nga e akuzuara Uka, faktin se e njëjta është person i shtyrë në moshë, pensioniste dhe me probleme shëndetësore dhe se e njëjta nuk është dënuar më parë, raporton Betimi për Drejtësi.
Ndryshe, një ditë më parë, e akuzuara Uka pranoi fajësinë për veprën penale që i vihej në barrë.
Ndryshe, Prokuroria Themelore në Mitrovicë më 24 maj 2022, ka ngritur aktakuzë kundër Hamide Ukës, me arsyetimin se më 6 maj 2019 duke shfrytëzuar pozitën zyrtare ose autorizimin, ka tejkaluar kufirin e autorizimit të saj, me qëllim që të përfitojë çfarëdo dobie për vete ose për personin tjetër, gjegjësisht për personin Alban Basha.
Sipas aktakuzës, e njëjta në ditën e lartpërmendur, si zyrtare për regjistrimin civil të banorëve në Komunën e Vushtrrisë, me qëllim të regjistrimit në sistemin elektronik, ka futur të dhëna për personin Alban Basha, ndërsa nuk e ka respektuar procedurën lidhur me regjistrimin dhe lëshimin e ekstraktit të lindjes, e as procedurën e verifikimit dhe Udhëzimit Administrativ për regjistrimin civil, sepse nuk e ka bërë vështrimin në të gjitha librat, e as nuk e ka siguruar dokumentacionin e fotokopjuar, sipas procedurës e cila parashihet për regjistrimin e civilëve, e që ishte e obliguar ta bëjë para se të fillojë ekzekutimin e çfarëdo veprimi zyrtar.
Me këtë, akuzohej se ka kryer veprën penale “Keqpërdorimi i pozitës apo autoritetit zyrtar” nga neni 414, par.1 të Kodit Penal.
