Në prag të balotazhit të së dielës, të dhënat nga udhëzuesi zyrtar i Komisionit Qendror të Zgjedhjeve (KQZ) sqarojnë qartë rregullat për votimin me asistencë, një procedurë që u mundëson qytetarëve me paaftësi fizike ose verbëri të ushtrojnë të drejtën e tyre të votës.
Sipas udhëzuesit, asistenca në votim lejohet vetëm për persona që, për arsye fizike, nuk mund të votojnë vetë, ndërsa çdo keqpërdorim i kësaj procedure përbën shkelje të ligjit dhe mund të ndëshkohet penalisht.
Si lejohet votimi me asistencë
Votuesi që ka nevojë për ndihmë zgjedh vetë personin që e asiston në kabinën e votimit.
Asistenti duhet të jetë votues në të njëjtën komunë ku zhvillohet votimi.
Një person mund të asistojë vetëm një (1) votues gjatë ditës së zgjedhjeve.
Anëtarët e Këshillit të Vendvotimit, vëzhguesit dhe pjesëtarët e Policisë nuk mund të jenë asistentë.
Emri, mbiemri dhe numri i identifikimit të personit që ofron asistencë regjistrohen në listën e votuesve nga Këshilli i Vendvotimit, për transparencë dhe për të parandaluar keqpërdorimet.
Analfabetizmi nuk është arsye për asistencë
Në dokumentet e KQZ-së theksohet se një votues analfabet, por fizikisht në gjendje të shënojë votën vetë, nuk ka të drejtë të kërkojë asistencë.
“Ky rregull është vendosur për të mbrojtur sekretin dhe lirinë e votës,” thuhet në udhëzues.
Keqpërdorimi dënohet
Ligjet në fuqi të Republikës së Kosovës parashohin se çdo tentativë për manipulim të votës apo ushtrim ndikimi ndaj votuesve, përmes procesit të asistencës apo mënyrave tjera, përbën vepër penale dhe ndëshkohet sipas Kodit Penal të Kosovës.
Këto dispozita janë vendosur për të mbrojtur integritetin e procesit zgjedhor, si dhe për të siguruar që asistenca të përdoret vetëm nga ata që realisht kanë nevojë për të.
