I dërguari i posaçëm i BE-së për dialogun Kosovë-Serbi, Miroslav Lajçak, së bashku me atë të ShBA-së për Ballkanin Perëndimor, Gabriel Escobar, kanë takuar sot presidentin e Serbisë, Aleksandar Vuçiq.
Në llogarinë e tij në Twitter, Lajçak ka thënë se në këtë takim kanë diskutuar për gjendjen komplekse të serbëve në Kosovë.
“Në Beograd, Gabriel Escobar dhe unë patëm diskutime të gjata me Aleksandar Vuçiq për gjendjen komplekse të serbëve në Kosovë. Dhuna nuk është kurrë e pranueshme dhe nevojitet urgjentisht një zgjidhje politike për krizën aktuale. Ne e vlerësuam gatishmërinë e tij për të kontribuar në të”, ka shkruar Lajçak në Twitter.
In Belgrade, ?? DAS Escobar and I had long discussions with @predsednikrs @avucic about the complex situation of the Serbs in Kosovo. Violence is never acceptable and a political solution to the current crisis is urgently needed. We appreciated his readiness to contribute to it. pic.twitter.com/jlj0lw2xAd
— Miroslav Lajčák (@MiroslavLajcak) June 7, 2023
Kujtojmë se BE dhe SHBA në takim që kishin me Kurtin të hënën, paraqiten tri kushte lidhur me krizën aktuale, e që ishin: qetësimi i situatës në veri, mbajtja e zgjedhjeve të reja dhe kthimi në dialog.
Escobar në takimin që kishte të martën me gazetarët në Prishtinë, ka thënë se presin që më së largu sot (e mërkurë) të këtë një marrëveshje për qetësim të situatës në veri.
Ndërkaq presidentja e Kosovës, Vjosa Osmani, citohet t’u ketë thënë dje gjatë takimit të dërguarve të SHBA-së dhe BE-së, Gabriel Escobarit dhe Mirosllav Lajçakut, se vetëm ndëshkimi i grupeve kriminale mund të çojë në një “stabilitet të qëndrueshëm dhe afatgjatë”.
Kurse kryeministri i Kosovës, Albin Kurti, në takim me emisarët Miroslav Lajçak e Gabriel Escobar, ka shprehur gatishmërinë “e parezervë dhe mirëbesimin e palëkundur për angazhim intensiv e të përbashkët në shtensionimin e gjendjes dhe normalizimin e marrëdhënieve”.
Kurti ka thënë se rruga para është ndalimi i sulmeve nga ekstremistët e dhunshëm e grupet kriminale.
Kreu i Qeverisë tha se vetëm sundimi i ligjit mund ta hapë rrugën e zgjedhjeve të parakohshme në komunat veriore.
