Ministri i Financave, Hekuran Murati të premten sugjeroi që komunat të japin nga 100 euro për secilin tatimpagues për pronë sivjet, mirëpo këtë po e kundërshton opozita dhe po kërkon që të kthehet vlerësimi i vjetër.
Lidhur me këtë, ministri Murati thotë se arsye e kësaj është ngase janë me qindra biznesmenë, ndërtimtarë e tregtarë, ku me vlerësimin që po kërkon opozita, secili do të paguante mijëra euro më pak. Sidomos bizneset ndërtimore, të cilat kanë në pronësi me qindra banesa që i mbajnë pa shitur, në mënyrë që artificialisht të mbajnë çmimet e larta për banesa.
Murati thotë se me propozimin e opozitës/LDK-së 95% e tatimpaguesve nuk do të përfitonin nga falja e tatimit në pronë
Nëse e marrim vetëm një rast të një biznesmeni ndërtimtar, me vlerësimin e vjetër do të paguante 27 mijë euro më pak tatim sesa me vlerësimin e ri – raste të tilla ka shumë
Një tjetër pronar marketesh, me vlerësimin e vjetër që po e kërkon LDK, do t’i binte të paguajë rreth 70 mijë euro më pak. Pra, kushdo që me të vërtetë ka hallin e qytetarëve, e mbështetë propozimin që secilit t’i falen deri në 100 euro nga fatura e tatimit në pronë.
E ata që kanë hallin e biznesmenëve e ndërtimtarëve, e mbështesin propozimin e opozitës që të MOS u lehtësohet barra 95%-shit, por të mbrohen ndërtimtarët e tregtarët.
Ndërsa sa i përket ligjit të ri, Murati thotë se si Qeveri shumë shpejt do ta dërgojë ligjin në Kuvend.
“Në ligjin e ri do të përfshijmë edhe dispozitën e faljes së faturës së tatimit deri në 100 euro për vitin 2023, si dhe do të rrisim fleksibilitetin e komunave dhe do të bëjmë tatimin progresiv për vitin 2024 e tutje, ashtu që, ata që kanë më pak të paguajnë më pak, ndërsa ata që kanë më shumë, të paguajnë më shumë”, shkroi ministri Murati.
