Ministrja e Arsimit, Shkencës, Teknologjisë dhe Inovacionit, Arbërie Nagavci ka vizituar Gjimnazin “Hamëz Jashari” në Skënderaj, ku po mbahej testimi i nxënësve në vlerësimin ndërkombëtar PISA 2025.
Gjatë vizitës, ministrja Nagavci u takua me nxënësit dhe stafin e shkollës, duke përcjellë nga afër procesin e testimit dhe duke vlerësuar angazhimin e tyre në këtë vlerësim të rëndësishëm ndërkombëtar. Ministrja konsideroi se pjesëmarrja në PISA është një mundësi e vlefshme për të matur dhe kuptuar më mirë kompetencat e nxënësve tanë në lexim, matematikë dhe shkencë, si dhe për të reflektuar mbi zhvillimin e mëtejshëm të sistemit tonë arsimor.
Ministrja Arbërie Nagavci ka theksuar rëndësinë e mbështetjes së nxënësve për të arritur rezultate më të mira, përmes rishikimit të teksteve shkollore.
Ministrja shprehu mirënjohje për të gjithë ata që kanë kontribuar në mbarëvajtjen e këtij procesi dhe ritheksoi përkushtimin e Ministrisë për të përdorur të dhënat e këtij vlerësimi në hartimin e politikave të qëndrueshme dhe cilësore në arsim.
PISA 2025, këtë vit do të mbahet në 239 shkolla të Kosovës dhe do t’i nënshtrohen 7.300 nxënës të moshës pesëmbëdhjetë vjeçare. Nxënësit do të testohen në tri fusha, me fokus të veçantë këtë vit, në shkencë dhe mjedis. Cikli i testimit të nxënësve i cili ka filluar sot, do të përmbyllet më 30 maj.
MAShTI ka ndërmarrë një sërë përgatitjesh për testin PISA 2025, duke përfshirë edhe digjitalizimin e testimit, ku këtë vit për herë të parë testi do të zhvillohet në mënyrë tërësisht digjitale.
