Kryetari i Komisionit të Pavarur të Mediave, Jeton Mehmeti, vendimin që të lejohen për ritransmetim kanalet e Serbisë që shfaqen mesazhe mbështetëse për terroristët që kryen sulmin më 24 shtator 2023 në Banjskë, është munduar ta arsyetoj duke thënë se ka pasur kërkesa nga qytetarët që të lejohen programet sportive serbe “Arena sport” – që transmetoheshin nga disa operatorë kabllorë në Kosovë.
Në Komisionin për Administratë Publike, Pushtet Lokal, Media dhe Zhvillim Rajonal, Mehmeti ka theksuar se janë garantuar nga rrjeti televiziv serb se më nuk do të shfaqen përmbajtje kërcënuese për Republikën e Kosovës.
Vitin e kaluar në kanalet sportive serbe “Arena sport” ishin shfaqur mesazhe kërcënuese për Kosovës dhe që glorifikonin terroristët e vrarë në Banjskë. Më pas, ishte ndaluar transmetimi i këtyre kanaleve në Kosovë.
“Më 6 shkurt kemi pasur mbledhje të Komisionit me shumë pika dhe janë marrë shumë vendime. Më 7 shkurt na ka ardhur një ftesë që thotë se ftohen anëtarët të marrin pjesë në dëgjimin para komisionit dhe sot jemi para jush. Sa i përket shfuqizimit të vendimi tonë për pezullim të kanaleve të Arena Sport, përgjigja është se jemi bazuar në faktin se kanë pushuar rrethanat të cilat na kanë determinuar marrjen e një vendimi të tillë. E dyta, kemi marrë garancion nga operatorët dhe kanalet e Arena Sport se përmbajtjet e tilla nuk do të përsëriten më kurrë. Dhe e treta, kemi pasur parasysh interesin e përdoruesve për të pasur qasje në ngjarje sportive që i ofrojnë këto kanale”, ka thënë Mehmeti.
Mehmeti ka deklaruar se ia kanë dhënë shansin e fundit “Arenës” dhe se kjo e fundit e ka pranuar kushtin, duke e paralajmëruar se “ripërsëritja e një mesazhi politik në kanalet sportive Arena do të rezultojë në mbylljen permanente të këtyre kanaleve në Republikën e Kosovës”.
“Vendimmarrja jonë është e bazuar në tri kushte, e para kërkimfalje mbi atë çfarë ka transmetuar dhe për informacionin tuaj ai spot televiziv i cili është ndaluar nga ne jo nga ju, nuk ka qenë në transmetim as 24 orë sepse menjëherë kemi intervenuar. Pra, është bërë kërkimfalja. Janë bërë garanci edhe nga prodhuesi edhe nga shpërndarësit se do të krijojnë ekipe që do ta shqyrtojnë çfarëdo kontenti që transmetohet në Kosovë dhe kanë dhënë siguri se do të respektohen në plotni rregulloret e KPM-së”, ka theksuar ai.
Kërkohet shkarkimi i Bordit të KPM-së
Në Komisionin për Administratë Publike, Pushtet Lokal, Media dhe Zhvillim Rajonal, është kërkuar shkarkimi i Bordit të Komisionit të Pavarur të Mediave pas kthimit të kanaleve sportive serbe “Arena” në operatorët kabllorë në Kosovë.
Deputeti i Lëvizjes Vetëvendosje, Nijazi Isaku, ka qenë ai që e ka kërkuar shkarkimin e tij. E, ai ka përmendur edhe ndaljen e transmetimit gjatë fjalës së kryeministrit Albin Kurti në Këshillin e Sigurimit të Kombeve të Bashkuara.
“E patë dje çka ndodhi, një ngjarje e madhe kryeministri i vendit në Këshillin e Sigurimit dul IPKO e bllokoi. Foli Vuçiqi nuk pat diçka deri e kryejti, filloi kryeministri i Kosovës e ndalën rrjetin. Edhe Serbia po ashtu. Një kërkimfalje e japin ata dhe shkoj kjo ngjarje, s’ka ndëshkime… Pas këtij vendimi skandaloz që e keni marrë, do të kërkoj shkarkimin tuaj që sot”, ka thënë Isaku.
Por, deputeti Besnik Tahiri nga AAK, ka thënë se këtë çështje e sheh si presion politik ndaj anëtarëve të KPM-së.
