Inspektorati Policor i Kosovës (IPK) njofton se ka nisur një hetim preliminar rreth veprimeve të policisë si dhe sigurimit të të gjitha shkresave lidhur me rastin e vdekjes së 18-vjeçarit L.F., si pasojë e lëndimeve që mori nga rrahja e dy bashkëmoshatarëve të tij.
Përmes një përgjigje për Betimi për Drejtësi, IPK njofton se me këtë hetim preliminare, do të grumbullohen informacione shtesë rreth veprimeve të policisë dhe do të sigurohen shkresat e rastit.
“Ju informojmë se lidhur me këtë rast Inspektorati Policor i Kosovës sipas detyrës zyrtare ka filluar një hetim preliminar që përfshin përveç tjerash edhe grumbullimin e informacioneve shtesë rreth veprimeve të policisë si dhe sigurimin e të gjitha shkresave lidhur me këtë rast. Veprimet tjera do të ndërmerren varësisht nga të gjeturat e hetimit preliminar dhe autorizimeve ligjore të IPK-së”, thuhet në përgjigjen e IPK-së.
Ndryshe, të shtunën, Prokuroria Themelore në Prishtinë ka njoftuar se dy të dyshuarit për rrahjen e 18-vjeçarit me pasojë vdekjen, janë në paraburgim.
“Prokuroria Themelore në Prishtinë, njofton opinionin publik lidhur me rastin e dt. 15 janar 2024, në Podujevë, ku pas një përleshje fizike, dy të dyshuar (të mitur) e kanë goditur me një shkop viktimën (tashmë të ndjerin, 18 vjeç), duke i shkaktuar lëndime trupore, ku si pasojë e këtyre lëndimeve të marra, viktima është dërguar në QKUK për trajtim mjekësor, ndërsa po në të njëjtën ditë, me urdhër të Prokurorit të Shtetit, dy të miturit janë ndaluar për shkak të veprës penale “Vrasje në tetnativë” (tashmë vrasje) dhe rasti ka filluar të trajtohet në Prokurorinë Themelore në Prishtinë. Brenda afatit ligjor, pranë gjykatës kompetente, prokurori ka kërkuar masën e paraburgimit për të dyshuarit, e cila është aprovuar dhe të dyshuarit aktualisht ndodhen nën masën e paraburgimit”, thuhej në njoftim.
Viktima i cili po trajtohej në QKUK, ndërroi jetë të shtunën.
