Njësia Taks Forcë e Policisë së Kosovës ka realizuar një operacion në rajonin e Vitisë, me ç ‘rast në një depo private ka arritur të sekuestroj rreth 7.65 tonë vajra motorike, të dyshuara si të kontrabanduara nga Maqedonia e Veriut, e të cilat dyshohet se janë me prejardhje nga Irani.
Sipas policisë vlera e mallit të sekuestruar arrin mbi 25,000 euro.
“Me urdhër të Prokurorit të Prokurorisë Themelore në Gjilan gjatë operacionit të kontrollit në një depo private, janë sekuestruar rreth 7.65 tonë vajra motorike, të dyshuara si të kontrabanduara nga Maqedonia e Veriut dhe dyshohet me prejardhje nga Irani. Vlera e mallit të sekuestruar arrin mbi 25,000 euro”, thuhet në njoftim.
Policia njofton se mallrat janë dërguar në terminalin doganor për procedura të mëtejshme.
“Rasti është duke u trajtuar nga Njësia e Hetimeve Rajonale e Doganës së Kosovës – DRK Lindje, me fokus në identifikimin dhe ndjekjen penale të personave të përfshirë”, thuhet në njoftim.
“Policia e Kosovës ne bashkëpunim me autoritetet tjera shtetrore mbeten të përkushtuara në luftimin e kontrabandës dhe veprimtarive të paligjshme në zonat kufitare”, përfundon njoftimi
