Ad image

Konfirmohet raportimi i Kosovanews: Zhdoganohet “Rolex”-i, që iu bë dhuratë ministrit Sveçla

Kosova News
Kosova News 15:02 -05/06/2022

Ora e shtrenjtë “Rolex” e pranuar nga ministri i Punëve të Brendshme dhe Administratës Publike Xhelal Sveçla nga kryeministri i Katarit, është zhdoganuar. Kosovanews, ka raportuar dje për këtë rast duke theksuar se Sveçla e ka paraqitur dhuratën me vlerë mbi 30 mijë euro në Doganën e Kosovës për t’iu nënshtruar proceduarave ligjore që më pas ta lë atë si suvenir për ministrinë. Sot nga mediat është raportuar dhe konfirmuar zyrtarisht se kjo orë është zhdoganuar.

Sipas Doganës, zyrtarët që ishin bashkë më Sveçlën kanë njoftuar për këtë dhuratë më 28 maj, ditën kur Sveçla ishte kthyer nga Katari, raporton Express.

Kështu ka deklaruar, zëdhënësi i Doganës, Adriatik Stavileci.

Ai ka thënë se shoqëruesit e Sveçlës kanë njoftuar zyrtarët doganor se shteti pritës i ka dhuruar një orë dore ministrit.

“Me datë 28 maj 2022, është kthyer nga vizita zyrtare në Katar delegacioni i ministrit Sveçla. Me këtë rast zyrtarët shoqërues të ministrit Sveçla, konform procedurës dhe kërkesave ligjore, kanë njoftuar zyrtarët doganor se shteti pritës i ka dhuruar një orë dore. Ditëve vijuese të punës zyrtarët përgjegjës nga Ministria e Punëve të Brendshme dhe Administratës Publike kanë dërguar edhe shkresë zyrtare që sqaron çështjen e dhuratës dhe dhurata është zhdoganuar konform dispozitave të Kodit Doganor dhe Akcizave për dhuratat e pranuara nga aktiviteti në marrëdhëniet ndërkombëtare”, ka thënë Stavileci për Express, përcjellë Kosovanews.

Se një dhuratë e tillë i është bërë Sveçlës e kanë konfirmuar edhe nga Agjencia Kundër Korrupsionit.

Drejtori i AKK’së, Yll Buleshkaj, ka deklaruar se Kabineti i ministrit Sveçla ka njoftuar për këtë dhuratë dhe që e njëjta do të deklarohet.

Buleshkaj ka thënë se Ligji e parasheh një procedurë administrative për deklarim të dhuratave protokolare, për të cilën thotë se sipas informatave që ka është iniciuar.

“Atë që mund ta konformoj është që kabineti i ministrit e ka njoftuar Zyrën e Drejtorit të AKK për këtë dhuratë protokolare që ka pranuar në Katar dhe që e njëjta do deklarohet. Ligji e parasheh një procedurë administrative për deklarim të dhuratave protokolare e cila sipas informatave që posedoj është iniciuar. Me vjen keq, por për vlerën nuk mund t’ju them diçka por me gjasë ka vlerë të konsiderueshme”, ka thënë Buleshkaj.

Sipas Ligjit për deklarimin dhe kontrollin e pasurisë dhe prejardhjen e dhuratave, “personi zyrtar nuk mund të kërkojë ose të pranojë dhurata ose favore të tjera për vete, as për anëtarët e familjes, që kanë të bëjnë me ushtrimin e detyrave zyrtare dhe të cilat ndikojnë, ose mund të ndikojnë në ushtrimin e detyrave zyrtare, përveç dhuratave protokollare dhe dhuratave të rastit”.

Dhurata protokollare konsiderohen dhuratat e sjella nga përfaqësuesit e vendeve të huaja dhe të organizatave ndërkombëtare gjatë vizitave dhe rasteve të tjera dhe dhuratat e sjella në kushte të ngjashme.

Menjëherë pas pranimit, ose pas kthimit në vend, zyrtari duhet të paraqesë dhuratën.

“Personi zyrtar duhet ta informojë me shkrim eprorin e tij, nëse i është ofruar ose dhënë një dhuratë pa paralajmërim dhe në rrethana specifike. Në rast se personi zyrtar është drejtues institucioni, ai duhet ta informojë Agjencinë”, parasheh ligji.

Dhuratat protokollare bëhen pronë e institucionit në të cilin personi zyrtar ushtron detyrën, sipas ligjit.

Por nëse zyrtari që e ka pranuar dhuratën bën kërkesë, Agjencia me vendim mund të lejojë të merret dhurata nëse ekzistojnë arsye bindëse se dhurata i është dhënë për qëllime personale.

“Me kërkesën e personit zyrtar që ka pranuar dhuratën, Agjencia me vendim mund të lejojë të merret dhurata nëse ekzistojnë arsye bindëse se dhurata i është dhënë për qëllime personale dhe nuk ndikon ose nuk duhet të ndikojë në kryerjen e detyrës zyrtare”, parashihet me ligj.

Për zyrtarët që i shkelin dispozitat e këtij ligj, mund të merren masa disiplinore e në rast dyshimi për vepër penale, Agjencia pas hetimeve paraqet kallëzim penal.

“Nëse Agjencia konstaton se personi zyrtar i ka shkelur dispozitat e këtij ligji dhe nëse shkelja nuk dyshohet se përbën vepër penale, informon institucionin në të cilin personi zyrtar ushtron detyrën dhe kërkon që ndaj shkelësit të merren masa disiplinore. Institucioni përkatës duhet ta informojë Agjencinë për masat disiplinore që janë marrë ndaj personit zyrtar. Në raste dyshimi për vepër penale, Agjencia pas hetimeve të kryera, ia paraqet kallëzimin penal prokurorisë kompetente”, thuhet në ligj.

Ndryshe, në media u raportua dje se ministri i Brendshëm Xhelal Sveçla, ka pranuar dhuratë nga sheiku i Katarit një orë ‘Rolex’ në vlerë 30 mijë euro, të cilën ia ka falur Ministrisë si suvenir të çmuar.

Lajmi nga mediumi KosovaNews, u shpërnda më pas edhe nga zëdhënësi i Lëvizjes Vetëvendosje, Arlind Manxhuka, i cili tha se Sveçla ka bërë një gjest jashtëzakonisht të mirë.

Një reagim ka ardhur edhe nga Arbër Zaimi, zyrtar i VV-së.

Ai ka shkruar në Facebook me një dozë sarkazme, duke thënë se Sveçla duhet të sigurohet që ‘Rolex’-in të mos mund ta përvetësojë ndonjë ministër nga partitë tjera në të ardhmen.

“Xhelal Sveçla nuk mjafton që nuk e mban për vete dhuratën e shtrenjtë, por ia kalon inventarit të shtetit. Ai duhet të sigurohet që Rolexin të cilin ia dhuroi kryetari i Katarit nuk do të mund ta përvetësojë ndonjë ministër nga partitë e hajnave, atëherë kur do të kenë mundësi të vijnë në pushtet, pra më së afërmi në vitin 2033”, ka shkruar Zaimi. /Kosovanews/

TAGGED: , , ,
Shpërndaje