Përgjegjësit për sulmin terrorist të së dielës në fshatin Banjskë të Zveçanit, duhet të sillen para drejtësisë. Kjo është e padiskutueshme dhe qëndrim i prerë i Bashkimit Evropian, ka thënë zëdhënësi i BE-së, Peter Stano.
Kështu është përgjigjur ai teksa është pyetur se a pret që Beogradi t’i transferojë në Kosovë të kërkuarit që po trajtohen në spitalet e Serbisë dhe a do të ketë rol në këtë BE-ja.
“Në lidhje me përgjegjësinë dhe mosndëshkueshmërinë, pozicioni i BE-së është i qartë. E kemi thënë disa herë, dhe po e përsëris: tani për tani, është shumë e rëndësishme që të jenë të gjithë faktet, të jetë plotësisht e qartë dhe plotësisht e hetuar se çka ndodhi, si ndodhi, kush po merrte pjesë, kush po e organizonte dhe të gjithë ata përgjegjës për këtë sulm të tmerrshëm terrorist, duhet të vihen para përgjegjësisë dhe ballafaqohen me drejtësinë. Kjo është e padiskutueshme, dhe është qëndrim i prerë i BE-s”, u shpreh ai.
Sipas Stanos, në këtë fazë është e rëndësishme që të ketë qartësim të plotë dhe një hetim të mirëfilltë për të parë se kush mban përgjegjësi.
“Tani, çfarëdo hetimi që është duke u kryer dhe cili do të jetë roli i BE-së në lehtësimin dhe bartjen e mesazheve e të tjera…komunikimi ynë me partnerët bëhet në kanalet e përshtatshme, dhe jo nëpërmjet mediave e publikut. Pra ne jemi në kontakt, bëjmë aq sa mundemi brenda kompetencave dhe mandatit, por përfundimisht, ajo çka është mëse e rëndësishme në këtë fazë, në raport me sulmin terrorist nga e diela është që të ketë qartësi të plotë, të ketë një hetim të mirëfilltë për të parë se kush mban përgjegjësi”, shtoi ai.
Më 24 shtator, në orët e hershme të mëngjesit, Policia e Kosovës u sulmua nga një grup personash të maskuar dhe të armatosur derisa po shkonte për ta hetuar bllokimin e një rruge nga dy kamionë pa targa në fshatin Banjskë të Zveçanit.
Si pasojë, u vra polici i Kosovës Afrim Bunjaku, ndërsa disa policë të tjerë u plagosën. Gjatë shkëmbimit të zjarrit, policia i vrau tre sulmues të nacionalitetit serb, ndërsa i arrestoi tetë të tjerë.
Ndërkohë sot ministri i Punëvë të Brendshme, Xhelal Sveçla ka publikuar video ku shihet Milan Radojçiq, nënkryetari i Listës Serbe se ka qenë udhëheqës i grupit terrorist i cili sulmoi Policinë e Kosovës të dielën e 24 shtatorit në Bansjkë ku mbeti i vrarë rreshteri policor, Afrim Bunjaku, një tjetër polic i plagosur e disa të lënduar.
