Ministri i Financave, Punës dhe Transfereve, Hekuran Murati, në një konferencë për media, njoftoi se Qeveria e ka proceduar Ligjin e Pagave.
Gjatë një konference për media ministri Murati, ka sqaruar se nuk janë kundër grevistëve, por sipas tij ata do të trajtohen sipas legjislacionit në fuqi.
“Si Qeveri e kemi proceduar Ligjin e Pagave dhe është në konsumime të ndryshme dhe i njëjti do të dalë në konsultime publike. Në shtator kur të kthehet Kuvendi nga pushimet, projektligji do të procedohet në Kuvend”, tha ai.
Ministri Murati tha se sektori i arsimit është i prioritet i Qeverisë së Kosovës.
“Në këtë projektligj janë marrë parasysh edhe kërkesat e mësimdhënësve, për ruajtjen e pozitave që janë tepricë teknologjike… “Përkundër plotësimit të kërkesave, nga BSPK dhe SBASHK-u kërkojmë të ndalojnë grevën”, tha Murati.
Sipas tij, greva është një e drejtë, por grevistët kur hyjnë në grevë, kompensohen nga sindikatat.
Murati theksoi se praktikat dhe konventat ndërkombëtare nuk i obligojnë punëdhënësit për t’i paguar punëtorët që janë në grevë.
Ai tha se stafi arsimor duhet të rikthehet në punë, në të kundërtën nuk do të paguhen.
Ministri i Financave, Punës dhe Transfereve, Hekuran Murati, në këtë konferencë ka folur edhe për përkrahjen e personelit shëndetësor, përkundër që nuk ka qenë kërkesë e sindikatës, por ka qenë vullnet dhe vendim i Qeverisë.
Murati vlerësoi e me grevën paralajmëruar nga mësimdhënësit, do të humbin nxënësit, por edhe mësimdhënësit, pasi ata nuk do të paguhen për këtë periudhë greve.
“Edhe me ligj parashihen që në rast grevash, nëse ka punëtorë që nuk janë pajtuar me grevën dhe janë duke punuar, ata do të paguhen. Ata që do të jenë pjesë e grevës nuk do të paguhen dhe ata duhet të kompensohet nga sindikatat ”, theksoi ai.
Ai ka shtuar se gjatë viteve dhe për vit sindikatat marrin para nga anëtarësia dhe me ato para ata mund të bëjnë pagesat për orët e grevës, por assesi nuk mund të paguhen nga punëdhënësi, sepse kështu përcaktohet me ligje.
“Greva duhet të deklarohet dhe ajo është instrument për t’u mbrojtur punëtorët, sepse ata që janë në grevë nuk mund askush ti largoj nga puna. Por nëse ka punëtorë që nuk deklarojnë se janë në greve dhe nuk punojnë atëherë kjo është çështje disiplinore”, ka thënë Murati.
