Kryeshefi i Kompanisë për Menaxhimin e Deponive në Kosovë (KMDK) Dardan Velija nëpërmjet një komunikate për media ka informuar publikun lidhur me raportin e fundit të auditimit nga Zyra Kombëtare e Auditimit të Kosovës (ZKA), që ka ngritur shqetësime për dobësitë e identifikuara në menaxhimin e kontratës “Mirëmbajtja dhe Riparimi i Infrastrukturës në Deponitë Sanitare dhe Stacionet e Transferit”, të nënshkruar më 30.09.2021, gjatë udhëheqjes së administratës së mëparshme.
Si kryeshef ekzekutiv i KMDK-së, z. Velija siguroi publikun dhe të gjitha palët e interesuara se këto çështje janë duke u trajtuar me seriozitet të plotë dhe tashmë janë ndërmarrë veprime korrigjuese për të adresuar shqetësimet e ngritura.
“Menaxhimi i duhur i kontratave dhe transparenca financiare janë parime kyçe për organizatën tonë. Edhe pse ky auditim ka të bëjë me një kontratë që është nënshkruar dhe zbatuar nga administrata e mëparshme, si udhëheqës i kësaj ndërmarrjeje, marr përgjegjësinë për të siguruar që reformat e nevojshme dhe masat e llogaridhënies të zbatohen pa vonesë,” thuhet ndër të tjera në komunikatë.
Në raportin e ZKA-së janë evidentuar tejkalimi i disa pozicioneve dhe mos shfrytëzimi i pozicioneve të tjera financiare, si dhe tejkalime të sasive të kontraktuara dhe pagesa të paautorizuara në një shumë prej 958,189 €. Mospërputhje me ligjin e prokurimit: përfshirë devijime kontraktuale që kanë tejkaluar kufirin ligjor prej 30% sipas kontratës dhe lënie pa shfrytëzuar të shumicës së linjave të kontraktuara. Mungesë dokumentacioni dhe mbikëqyrje të duhur: Kjo ka ngritur shqetësime serioze për transparencën financiare dhe mundësitë për keqpërdorim dhe korrupsion. Mungesë miratimesh dhe kontrollesh të nevojshme.
Për të gjitha këto kryeshefi i KMDK-së, Dardan Velija ka thënë se janë duke u ndërmarrë veprimet nevojshme në çështje si:
Rishikimi i brendshëm i menaxhimit: Po ristrukturojmë ndërmarrjen dhe po vëmë rend dhe rregull në prokurim dhe menaxhim të kontratave, për të siguruar që të gjitha kontratat të jenë në përputhje me procedura të qarta dhe konkurruese.
Bashkëpunimi me autoritetet: Po bashkëpunojmë plotësisht me ZKA dhe çdo institucion hetimor përkatës dhe po ofrojmë të gjithë dokumentacionin dhe provat e nevojshme për një hetim të plotë dhe të drejtë.
Mbajtja përgjegjëse e personave të përfshirë: Jemi duke marrë masa disiplinore dhe ligjore për ata që janë përgjegjës për parregullsitë e identifikuara, duke përfshirë dhe ndjekjen e procedurave për rikuperimin e fondeve të keqpërdorura.
Përmirësimi i transparencës dhe monitorimit: Po implementojmë një sistem dixhital të monitorimit në kohë reale dhe po realizojmë trajnimet e nevojshme për të gjithë punonjësit që janë të përfshirë në menaxhimin e kontratave dhe prokurim.
Në komunikatën e KMDK-së thuhet se janë të angazhuar për të rikthyer besimin e publikut dhe për të siguruar menaxhim të përgjegjshëm dhe të efektshëm të fondeve publike. Ky proces do të përfshijë transparencë të plotë dhe komunikim të vazhdueshëm me qytetarët dhe institucionet përkatëse.
Komunikata e plote:
