Presidentja e Komisionit Evropian, Ursula Von der Leyen e cilësoi një moment historik konferencën e parë ndërqeveritare për Shqipërinë dhe Maqedoninë e Veriut.
Ajo u shpreh se ky është sukses i dy qeverive dhe qytetarëve që kanë punuar shumë, kanë pasur besim dhe vullnet.
Media e lirë, reformat, modernizimi i ekonomisë dhe bashkimi i shtetit ligjor ishin disa nga ndryshimet që diplomatja renditi, ndërsa shtoi se pikërisht këto ndryshime po sjellin cilësi më të mirë jetese.
Në një deklaratë për mediat nga Brukseli së bashku me kryeministrin shqiptar, Edi Rama, atë maqedonas Kovaçevski dhe me kryeministrin e Çekisë si vend që ka Presidencën e radhës së BE-së, ajo tha se përfitimet pas këtij momenti do të jenë të menjëhershme.
“Gjëja e parë që do të përfitojë Shqipëria me hapjen e negociatave do të jetë përfshirja e Shqipërisë në Mekanizmin Europian të Emergjencave Civile për t’u përballur me zjarret apo fatkeqësi të tjera natyrore”.
Sa i takon Maqedonisë së Veriut, komisionerja tha se do të diskutohet marrëveshja Frontex.
Suksesin për konferencë, Von der Leyen ia dedikoi dhe presidencës çeke gjithashtu. Në fund të fjalimit të saj falënderoi Ramën dhe Kovaçevskin për lidershipin dhe durimin e treguar.
“Ky është vetëm fundi i fillimit të një rruge drejt BE”. Kështu e ka përshkruar kryeministri Edi Rama këtë ditë historike për Shqipërinë gjatë konferencës së mbajtur në prag të nisjes së negociatave për vendin tonë në Bruksel.
Ai tha se duan të ndërtojnë një Shqipëri të fortë në një Ballkan të Hapur dhe demokratik.
“Lufta nga ana tjetër krrijuan një situatë të vështirë. Falenderoj Peten që është sot këtu i pranishëm për të shtyrë përpara integrimin e plotë të Ballkanit Perëndimor.
Ky nuk është fillimi i fundit por është fundi i fillimit. Situata është kjo që është dhe është mirë kështu si është. Ne duam të ngremë një Shqipëri europiane dhe të fortë në një Ballkan të hapur dhe të forte”, deklaroi Rama.
https://www.facebook.com/watch/live/?ref=external&v=620611225841637
