Kryeministri i vendit Albin Kurti tha se një artist me shije të hollë e me dije të gjerë nga sot nuk është më në mesin tonë, por Luan Mulliqi nuk shuhet, sepse vepra e tij jeton.
Kreu i Qeverisë përmendi se si edhe shkrimtarit më të madh shqiptar, Ismail Kadaresë, iu kishte ngulitur aq thellë në mendje një skulpturë e Nënës Terezë sa edhe pati shkruar: “Nënë Tereza e Mulliqit ka një metaforë të rrallë që duke shpërthyer nga toka dëshmon për vërtetësinë e shenjtores sonë.”
“Luan Mulliqi ka ndërruar jetë.
Si veprat, edhe emri i tij, jehon gjithandej. Pafund janë vendet në të cilat ka ekspozuar e ku veprat e tij janë të koleksionuara, njësoj sikur pafund janë punët që la pas. Një artist me shije të hollë e me dije të gjerë nga sot nuk është më në mesin tonë. Mungesën do t’ia ndjejmë përherë më shumë, por, Luanin do ta shohim në qytet nëpërmjet punës së tij. Artisti nuk shuhet, sepse vepra e tij jeton.
Ngushëllime familjes, miqve, kolegëve e studentëve të tij! Ngushëllime të gjithë neve!”, ka shkruar kryeministri Kurti.
Skulptori i njohur, Luan Mulliqi ka vdekur në moshën 70-vjeçare.
Sic ka njoftuar Akademia e Shkencave dhe Arteve të Kosovës, në të cilën Mulliqi ishte sekretar shkencor, të hënën në orën 11:00 në mjediset e saj do të mbahet mbledhja komemorative, ndërsa nga ora 11:30 do të fillojnë homazhet.
Funerali niset nga ASHAK-u në ora 13:00.
Varrimi do të bëhet në varrezat e qytetit të Gjakovës në orën 16:00.
