Kryeministri i Kosovës, Albin Kurti, deklaroi se vendosja e çmimit tavan për naftën ka dhënë rezultate, duke shtuar se Qeveria po operon që qytetarëve t’u dilet në ndihmë, por pa e shkelur Kushtetutën.
Kurti deklaroi të dielën para mediave se duhet bërë çmos që qytetarët të punësohen, të paktën një çdo familje të jetë një anëtar i punësuar.
“Ne e respektojmë edhe kushtetutshmërinë edhe ligjin dhe na duhet t’i dalim në ndihmë qytetarëve. Ju e dini që ne jemi zotuar për çdo familje të ketë një të punësuar. Këtë po e bëjmë, e kemi premtuar pra drejtësi dhe punësim. Me ministrat Murati e Hajdari, jemi në komunikim që të sjellim masa që i ndihmojnë qytetarët. Çmimi tavan për naftën ka dhënë rezultate, por duhet ta gjejmë mënyrën më të mirë, por të mos e shkelim kushtetutën”, deklaroi Kurti.
Ai ka shtuar se po diskuton me ministren e Tregtisë, Rozeta Hajdarin dhe ministrin e Financave, Hekuran Murati për masat ndaj shtrenjtimit të produkteve esenciale.
“Me ministrat Murati e Hajdari, jemi në komunikim që të sjellim masa që i ndihmojnë qytetarët. Çmimi tavan për naftën ka dhënë rezultate, por duhet ta gjejmë mënyrën më të mirë, por të mos e shkelim kushtetutën”, deklaroi Kurti.
Shefi i ekzekutivit, përmendi edhe nënshkrimin e programit Kompakt me MCC por u shpreh se shteti nuk ka më mundësi financiare të paguajë për energjinë e shfrytëzuar në veri të vendit.
Madje zbatimi i këtij udhërrëfyesi, Kurti tha se është gjëja e vetme që mendon kur bie të fle dhe zgjohet zëvendëskryeministri Besnik Bislimi por pati dilema nëse kohët e fundit është duke fjetur ose jo.
“Preokupimi ynë kryesor është zbatimi i udhërrëfyesit i cili do ta mundësojë që sa më parë të fillojë edhe pagesa e energjisë elektrike në veri të Kosovës sepse shteti ynë, qeveria jonë, nuk mund ta përballojë as financiarisht dhe as materialisht një përsëritje të viteve të mëhershme, pra duhet të fillojë inkasimi i energjisë elektrike në veri të Kosovës. E dini që ZRRE ka pasur dy javë kohë për licencimin, por e ka bërë për dy ditë, por nga ana tjetër, edhe sot e kësaj dite nuk e kemi regjistrin e konsumatorëve në veri. Ky është preokupimi ynë kryesor dhe kjo është çështja numër një me të cilën zgjohet në mëngjes dhe bie të fle në mbrëmje zëvendësi im, nëse fle, Besnik Bilsimi, sepse nuk ka gjë sot më të rëndësishme për të por edhe do të thosha edhe për shtetin tonë që të zbatohet ai udhërrëfyes dhe përfundimisht të kemi shërbimin e furnizimit edhe në veri, pagesën e energjisë së konsumuar dhe në këtë mënyrë edhe stabilitetin energjetik në Kosovë”, deklaroi Kurti.
